Ju’regimde qalg’an ma’n’gi bir arman
Sa’lem megaline.uz saytınan turaqlı paydalanıwshılar!
Ha’r bir insan o’mir soqpaqlarında tu’rli waqıyalarg’a gezlesedi eken. Solardın’ ishinde bul ju’rekte umıtılmas bolıp ma’n’gi qalıwshı “Muxabbat” sezimi. Durıs bul sezimdi ha’mme o’zinshe ta’riypleydi. Menimshe insan du’niyag’a kelgennen son’ kimdidur unatıwı, jaqsı ko’riwi ta’biyiy hal, biraq joqarıda aytıp o’tkenimdey muxabbat sezimin seziw bul ullı sezim ha’mmege de birdey nesip ete bermese kerek.
Aytıp bermekshi bolg’an hikayam bul menin’ barı jog’ı u’sh jıl o’mirim ishinde basımnan o’tkergenlerim boladi.
2014 – jıl men a’wmetli studentler qatarında ma’mleketlik grand tiykarında oqıwg’a qabıl qılındım quwanıshımnın’ shegi joq edi. Ata – anam, awıllas ag’ayın tuwısqanlarım, klaslass joralarım, kolledjdegi barlıq doslarım, menin’ menen birge sol ku’ni quwanshıma sherik bolıw maqsetinde u’yime keldi.
2- sentyabr mine uzaq ku’tken ku’nlerim kelip o’zim qa’legen oqıw da’rgayının’ bosag’asına ayaq basıw baxıtına erisken edim. Oqıw baslandı, toparımızda qızlar jigitlerge qarag’anda ko’p eken, birinshi paradan shıg’ıw bolg’anlıg’ın bildiriwshi ta’nepis qon’ıraw shalındı, ha’r kim o’z-o’zleri so’ylesip kete basladı.
Menin’ ko’zim bir shette aynag’a qarap turg’an qızg’a tu’sti, men og’an uzaq tigilip qarap turdım, bir na’rse oylap turg’anı anıq edi. Ol mag’an qarap na’zeri tu’sip ketti ha’m uyalıp jerge qaradı da arqasına aylanıp o’zi otırg’an parta ta’repke ketti. Men og’an keyin ulıwma itibar bermedim.
5- sentyabr ku’ni Ma’mleketimiz boylap festival hawası hu’kim su’rmekte edi. Men festivalg’a bir o’zim ketip baratırg’an edim. Doslıq kanalı boylap adamlar ag’ıp barmaqta edi. Sol waqıtları atımdı aytıp kimnin’dur baqırg’anın esittim, artıma a’ste qarasam ayna aldında oyg’a talıp turg’an qız eken tez – tez mag’an jetip alıw maqsetinde ju’rip kelmekte edi. Ol qız qasıma kelip sa’lemlesip bolg’anımızdan keyin basqa gruppalaslarımızdı ko’rmedin’be dep soradı. Men yaq yaki awa dep te juwap qaytaralmastan qatıp qalg’an edim, tek men bir o’zimmen dep juwap qaytara aldım, ol mag’an qarap ku’ldi ha’m, ju’r tezirek kesh qalamız dedi de asıg’ıs tu’rde ju’rip ketti.
Endi ol qız menin’ pu’tkilley aqıl esimdi alıp qoydı, otırsamda, jatsamda, jumıs islep qolım bos bolmasa da onı oylay beretin boldim. Men sol o’zim qabıl qılıng’an toparımızdın’ sa’rdarı bolıp tayınlandım. Oqıw tamam bolg’an boydan u’yge qaytıp kiyatırıp og’an qon’ıraw etetug’ın dos sıpatında qızıqlı waqıyalardı so’zlep beretug’ın boldım. Gu’zdin’ salqın samalları esip ku’nler izinen ku’nler o’teberdi, biraq men ele ol qızg’a jaqsı ko’retug’ınlıg’ımdı aytıwg’a ju’rek ete almay ju’r edim, biraq ku’nlerdin’ bir ku’ni ol qızdı bir jigittin’ janında ko’rip qaldım ha’m kesh bolıwdan og’an ku’ndegidey qon’ıraw ettim, ol da ku’limsirep trubkanı ko’terdi, men bayag’ıday og’an ku’lkili hikayalar aytıw ornına, bu’ginnen baslap sag’an ulıwma qon’ıraw etpeymen dedimda trubkanı qoyıp tasladım.
Sol taqlıtte eki aysha qon’ıraw etpedim. Ol qasıma kelip otırıp bir na’rseler demekshi bolsa tın’lamay turıp ketip qalatın edim, endi ol qız shıday almadıma yaki basqa da bir sebep boldıma, dos qızı arqalı mag’an xat jazıp jiberipti ol xatta mınanday qatarlar jazılg’an edi.
- Sag’an o’zi ne boldı men o’zimnin’ ten’ yarımımdı tawdım degenimde birden tu’sinersiz ha’reketlerin’ menen meni jalg’ız qaldırdın’sag’an unamaytug’ınday o’zi men ne qıldım ayıbım ne, mine aradan eki ay o’tti sen jigit bola turıp ne bolg’anın aytpag’anın’nan keyin qız bala bolsam da senin’ ahwalın’a qızıqtım o’tinish juwap jaz.
Men bul xattı oqıp ırası ko’zime jas keldi, sebebi ol qızdın’da mende kewili bar eken, keyinshelli bilsem onın’ janında ko’rgen jigit onın’ kolledj waqıtında birge oqıg’an jigit eken. Endi bizlerdin’ baxıtlı ku’nlerimiz baslandı, ha’r ku’ni oqıwdan birge qaytatug’ın, kitapxana, bazarg’a barmaqshı bolsa da mag’an xabarlasatug’ın, qullası bir-birimizge haqıyqıy su’yenish bolıwg’a tırıspaqta edik. Ol qız o’zlerimiz oqıytug’ın oqıw da’rgayımızdın’ studentler turar jayında turatug’ın edi. Men o’zim jaslar ortasında o’tkerilip turatug’ın “Quwnaqlar ha’m Ziyrekler” tan’lawına qatnasıwdı ju’da’ jaqsı ko’retug’ın edim.
Bir ku’nleri fakultetler ara usı tan’law o’keriletin boldı. Men fakultetimizdin’ isengen on eki qız jigiti qatarında edim ha’m jarıs ku’ni, ol qızg’a keliwin iltimas ettim. Saxna artında turman bir kezleri menin’ gezegim keldi, saxnag’a juwırıp shıqtım ha’m ro’limdi oynay basladım, sol barısında ko’zim menen sol qızdı izlemekte edim, biraq onı ko’zim tamashago’yler qatarınan taba almadım.
Kesh boldı, jarıs juwmag’ına jetti bizlerdin’ fakultet ulıwma orın ala almadı. Komanadalas doslarımız benen birge kewilsiz tu’rde u’yge qayttıq. Ol qızg’a bu’gin qon’ıraw etpegenim durıs dep esapladım, u’yge keldim de hesh kim joq bo’lmege kirdim de jatıp qaldım.
Tan’g’a jaqın altı shaması oyanıp telefonıma qaradım, su’yiklim ha’dden tıs ko’p qon’ırawlar etken eken. Ornıman turıp shala qalg’an kompyuterdegi jumslarımdı pitkerdim, azang’ı shayımdı iship ku’ndegidey oqıwg’a bardım, oyımsha ha’mme mag’an qolların begiz qılıp oynay almasa ne qıladı saxnag’a shıg’ıp dep meni ko’rsetip atırg’anday edi. İndemey qolıma sabaqlıg’ıma tiyisli kitaptı aldım da oqıy basladım, bir waqıtları qasıma kelip otırg’an qızdın’ atımdı aytıp mag’an so’ylep atırg’anı qulag’ıma shalındı qarasam ju’regim iyesi mag’an qarap ku’limsirep turar edi. Mende og’an qarap ıqtiyarsız tu’rde mıyıqta ku’limsirep qoydım, ol qız mag’an qarap ba’ri jaqsı boladı bıyıl bolmasa endigi jılı a’lbette chempion bolasızlar dep meni jubatqan boldı mende ku’limlep a’lbette sebebi qasımda sen barsan’ dep qoydım.
Men ol qızsız hesh bir na’rseni ko’z aldıma keltire almas edim. Ol qızdı bir ku’ni bir jigit sonshelli ko’p mazalay bergenligi sebepli mag’an aytıwg’a ma’jbu’r boliptı, ol jigittin’ telefon no’merin alıp qon’ıraw ettim, bizler jaqsı tillese almadıq ol mag’an bolar bolmas ga’plerdi aytıp so’gine ketti ha’m bizler ertesi ku’ni bir jerde ashıq aydın so’ylesip alıwg’a kelisip aldıq. Bul jigit penen bolg’an waqıyadan keyin emlewxana da heshkimge bildirmesten 3 ku’n dawalanıp shıqtım.
Toparlas doslarıma men rayong’a apamnın’ u’yinde bir sebeplerge go’re ketip qalg’anımdı isendiriw ushın a’kemdi zorg’a ko’ndirdim ha’m a’kem topar basshımızg’a meni belgili bir sebeplerge go’re apamnın’ u’yine ketkenligim haqqında ayttı.
Aradan u’sh ku’n o’tip bir ko’zimdegi azmaz tırtıq qalg’an bolsa da oqıwg’a keldim, su’yiklim meni ko’rip juwırıp keldide da’rriw ne boldı dep jalınıshlı tu’rde soray ketti men bolsa, hazillesip qızlar menen awılda apamnın’ qon’sısı bergen toyda tartısıp qaldım dep ha’zillestim.
Bul waqıyadan son’ ol jigit su’yiklimdi ja’ne mazalap ju’rgen eken su’yiklim bolsa men aytpasamda menin’ u’stimde sol jigit penen to’belesipti da dep ishine alıp mag’an ayta almay ju’re beripti.
KJJX usınısı menen ma’mleketimiz milliy baylıg’ı esaplang’an paxta jıyım teriminde qatnaspaqta edim, ol qız densawlıg’ına baylanıslı paxta mapazında bizlerge ja’rdem bere almay u’yinde qaldı. Ha’r ku’ni ha’r birimiz benen saatlap so’ylesetin bizlerden bul mapazdag’ı qızıqlı waqıylardı soraytın edi.
Men geren’ bolıp ko’zim aldım tınıp otırıp qaldım, sebebi meni menen to’belesken jigit aqırı su’yiklimdi alıp qashıp ketipti, bul ga’pti dostısı aytar eken ko’zinde az da bolsada mag’an ashınıw ko’rinisindegi jas tamshıları bar edi. Ata- anası bolsa ol u’ydin’ ishi menen aldın ala kelisip qoyg’an eken qızdın’ jalınıp jalbarıwı heshte payda etpepti.
Ol ha’zir a’jayıp kelinshek men bolsa niyetime jetip, sol ju’regim iyesi aytqaninday “Quwnaqlar ha’m Ziyrekler” jarısında shempion boldıq, men ta’g’dirge nalımayman biraq bir na’rsege o’kinemen, sonday a’jayıp qız hesh bolmasa bir ma’rtebe bolsa da saxnada turg’anımdı ko’rmedi. Ne bolsa da bul tekst qatarların aqırına shekem oqıp otırg’an zamanlasıma su’ygenine su’rnikpey jetisiwlerin ha’m a’lbette baxıtlı bolıwların tileymen.
Zulxanderov Izzat.
foto: amur saytınan.
Su’ygenimdi jaman ko’remen
Sa’lem megaline.uz paydalanıwshıları men bu’gin ırası menen de jarılıp ishimdegin aytpaqshıman. 2014 - jili a’wmetli studentler qatarında bolıp oqıwg’a grand tiykarında...
“Tan’lang’an tazg’a...”
Mektepte oqıp ju’rgen waqıtlarımda og’an g’ayıbana ashıq edim. Ol erteklerdegidey arıw, go’zzalıqta ten’siz edi... Aradan jıllar o’tip, oqıwdı pitkerdim. Ha’m u’ydegilerdin’...
Qar aralas sezim
Birinshi qar jawdı.... Esin’de ma? O’tken jılı ushraspasımızdan bir ku’n aldın ko’p bolıp qar jawıp edi. Sonda sen aytıp edin’- men sen ushın jawdırdım sol qardı...
Ku’nler menen xatlar…
Bir jigit sulıw qızg’a qattı ashıq bolıp, shın ju’regi menen sezim xatın jaza baslaptı. Ko’p waqıt o’tpesten, qızdan juwap xatı da kelipti. So’ytip, jigit konvertti ashsa...
Bu’gingi ku’n keshegiden basqasha
Eeeh ju’rek. Menin’ sag’an sorawım ko’p. Sebebin ha’zir aytaman…...
