Du’nyag’a ataqlı Adidas brendine Adolf Dassler atlı nemis tigiwshisi tiykar saldı. Ol birinshi du’nya ju’zlik urıstan keyin ayaq kiyim tigiw menen shug’ıllana baslaydı. Da’slebinde ol eski ayaq kiyimler ha’m avtomobil shinasınan sport ayaq kiyimlerin tigiwdi baslaydı.

1924 jılı ag’alı-inili Adolf pen Rudolf Dassler “Ag’ayinli Dassler ayaq kiyimi” fabrikasın du’zedi. Bul kishi kontsern futbolg’a arnalg’an butsı usıng’an edi. Adolf futbolg’a qattı qızıqqanlıqtan, butsıdın’ astına temir bu’rtiklerdi qoyıp shıg’aradı. Bul oyınshının’ sho’pte tayıp ketpewin ta’miyinleydi.

1927 jılı Dassler biznesinin’ quramına 25 xızmetker jumısqa alınıp, ku’nine 100 jup ayaq kiyim shıg’aratug’ın da’rejege jetedi. Al 1928 jılı Amsterdamda bolg’an Olimpiada oyınlarında birneshe sportshı Dasslerdin’ o’nimin kiyip, jarısqa qatnasadı.

Ekinshi du’nyaju’zlik urıs baslang’annan son’ ag’alı-inili Dassler-ler urısqa ketip qaladı. Aradan azg’ana waqıt o’tkennen son’ nemis basshılarının’ buyrıg’ı menen Adolf fabrikag’a qaytıp keledi. Ol a’skerlerge arnalg’an sport ayaq kiyimlerin tigiwi tiyis bolg’an. Al Rudolf urıs tamamlang’annan son’ fabrikag’a qaytadı.

1948 jılı bul eki ag’alı-inililerdin’ a’kesi qaytıs bolg’annan keyin kompaniyanı bo’lip alıwdı sheshedi. Adolf o’z kompaniyasın Addas (Adi Dassler), al Rodulf Ruda dep ataydı. Waqıttın’ o’tiwi menen eki atta azg’ana o’zgeredi. Addas brendtin’ atı Adidas, al Ruda – Puma bolıp o’zgeredi.

1954 jılı nemistin’ milliy futbol komandası Adolftın’ usıng’an astında temiri bar butsılardı kiyip, oyıng’a shıg’adı. Vengriya menen bolg’an matchta jawın jawıp, maydan tayg’aq boladı. Adolftın’ ayaq kiyimleri bul jag’daydan o’nimli paydalang’an. Al 1960 jılı Rim qalasında o’tkerilgen Olimpiada oyınlarına qatnasqan jen’il atlettlerdin’ 75%-i Adidas o’nimleri menen jarısqa qatnasadı.

Atı a’psanag’a aylang’an kompaniyanın’ tiykarshısı Adolf Dassler 1978 jılı 78 jasında du’nyadan o’tti. Ol waqıtları Adidas fabrikalarında jılına 45 million jup ayaq kiyim shıg’arılatug’ın edi.