2013- jıldın’ 15-16 may ku’nleri Tashkent qalasındag’ı Uzekspo orayında “Best Soft Uzbekistan – 2013” bag’darlamalıq o’nimlerdin’ forumı ha’m milliy ko’rgizbesi bolıp o’tti. Ko’rgizbege jergilikli ha’m sırt el bag’darlamalıq o’nimlerdi islep shıg’arıwshılar o’z o’nimleri menen qatnastı.

Bu’gingi ku’nde informatsiya kommunikatsiya texnologiyaları turmıstın’ barlıq tarawlarına kirip keldi. Bul bolsa o’z gezeginde softver sanaatının’ jedel rawajlanıwına ken’ jol ashpaqta. Atap o’tsek, ha’zirgi ku’nde ma’mleketimizde bag’darlamalıq o’nimlerdi jaratıw, islep shıg’arıw ha’m engiziw menen shug’ıllanıwshı subyektler iskerlik ko’rsetpekte. Olardın’ islenbeleri, bag’darlamalıq o’nimleri mine usı ko’rgizbede orın aldı.

Usı jılg’ı forum ko’rgizbenin’ tiykarg’ı bag’darları ma’mleketimizde “Elektron hu’kimet” sistemasın engiziw ha’m milliy bag’darlamalıq o’nimler bazarın rawajlandırıwdan ibarat. Sonday aq forumg’a bag’darlamalıq o’nimlerdi islep shıg’ıw ha’m engiziw tarawındag’ı jetekshi qa’nigeler qatnastı. Ekspertler usı tarawdag’ı son’g’ı jetiskenliklerdi usındı ha’m o’z ta’jiriybeleri menen bo’listi. Forum jumısı u’sh sektsiyada bolıp, “Elektron hu’kimet” kontseptsiyası: xalqara ta’jiriybe, O’zbekstan “Elektron hu’kimet” kontseptsiyası:interaktiv ma’mleket xızmetlerin islep shıg’ıw ha’m engiziw ha’mde Softver sanaatı rawajlanıwının’ tendentsiyaları ha’m jetiskenlikleri, İT bilimlendiriw, bag’darlamashı kadrlar menen ta’miyinlew.



O’tken jılı ko’rgizbege 40 bag’darlamalıq o’nimlerdi islep shıg’arıwshılar qatnasıp, 80 nen artıq islenbeleri usınılg’an bolsa, usı jılı 60 tan aslam kompaniyalar qatnasıp, olar 120 g’a shamalas o’z islenbeleri menen qatnastı.

İT kompaniyalar menen bir qatarda ko’rgizbege Mırza Ulug’bek atındag’ı O’zbekstan Milliy Universiteti ha’m Tashkent informatsiya texnologiyaları universiteti oqıtıwshıları ha’m studentleri ta’repinen islep shıg’ılg’an texnikalıq islenbeler ha’m bag’darlamalıq o’nimler qoyıldı.

Ko’rgizbege qoyılg’an o’nimlerden: “Ko’p funktsiyalı kodlang’an qulp”



TİTU Telekommunikatsiya qa’nigeliginin’ 3 kurs studenti Kurbanov Alisher “Ko’p funktsiyalı kodlang’an qulp” islenbesin ko’pshilik na’zerine usındı. Usı islenbeni esiklerge ornatsa giltsiz qulpırıw mu’mkinshiligin beredi ha’m u’y iyeleri giltsiz, kod arqalı ashıw ha’m qulpırıw mu’mkinshiligine iye. Usı islenbenin’ bag’darlamalıq ta’miyinleniwi C bag’darlamalastırıw tilinde jazılg’an bolıp, ol 2012 jıldın’ dekabr ayınan usı jıldın’ yanvar ayına shekem islep shıg’ılg’an. Sonday-aq Alisher TİTUnin’ ziyrek studentlerinen. Ol keleshekte FTTB texnologiyası boyınsha shug’ıllanbaqshı ha’m bul texnologiya boyınsha oktyabr ayında o’tkeriletug’ın konferentsiyag’ada qızg’ın tayarlanbaqta.

İnformatsiya sistemaların avtomatlastırıw

TİTUnin’ ja’ne bir ziyrek studenti “İnformatsiya sistemaları” 2 kurs magistrantı Mahmanov Orif. Ol usı ko’rgizbege
• “Kadrlar bo’limin basqarıw sisteması”;
• “İnformatsiya texnologiyaların u’yreniwge arnalg’an interaktiv multimediya sisteması” ha’m
• “Dekanat jumısın avtomatlastırıw” informatsiya sistemaların ko’pshilik na’zerine usındı.

Shet tillerin u’yreniw zaman talabı



TİTU No’kis filialı studenti, O’zbekstan Respublikası baylanıs informatsiyalastırıw ha’m telekommunikatsiya texnologiyaları ma’mleketlik komiteti stipendiantı Kalmuratov Bekbosın inglis tilin o’zbetinshe u’yreniwshiler ushın arnalg’an “Q-LING” bag’darlamasının’ 4 versiyasın ko’pshilik na’zerine usındı.

Jan’a interaktiv xızmetler xalıq iygiliginde



UzINFOCOM Orayı to’mendegi jobalar menen qatnastı:

• E-kommunal.uz kommunal xojalıg’ı ha’m u’y-jay fondı portalı;
• ID.UZ jalg’ız identifikatsiya sisteması (jan’a usılda);
• uMail.uz biypul elektron poshta xızmeti;
• Ziyonet portalındag’ı “Shet tili” bo’limi.

Sonday-aq “Best Soft Uzbekistan – 2013” forum ko’rgizbesinde Hindistan ha’m Koreyalıq kompaniyalardın’ o’nimleri qoyıldı.





Ko’rgizbede ko’pshilik itibarın tartqan ja’ne bir islenbe “AVTO TEST” elektron oqıw qollanbası boldı. Bunda multiplikatsiyalıq ko’rinisler arqalı jol ha’reketi qag’ıydalarınan test sorawların beredi. Bul bag’darlama arqalı paydalanıwshılar shofyorlıq gu’walıg’ın alıw imtixanlarına tayarlanıwg’a ko’meklesedi ha’m jol ha’reketi qag’ıydaların ja’nede tolıq o’zlestiriwge imkaniyat jaratadı.



Tekst qa’telerin tekseriw

Yurida Orfo kompyuter bag’darlaması o’zbek tilindegi kirill ha’m latın a’lippesindegi tekstti orfografiyalıq jaqtan tekseriwge arnalg’an. Bag’darlama tekstler menen islewshi ko’plegen funktsiyalardı atqaradı.

Salıq to’lewshiler ushın jan’a xızmet

Jan’a texnologiyalar ilimiy-informatsiya Orayı ta’repinen salıq to’lewshiler ushın interaktiv xızmetlerin usındı. Bul sistema online ha’m offline rejiminde de isleydi.

Ko’rgizbege o’z o’nimleri menen qatnasıp atırg’a iri kompaniyalardın’ biri “Global Solutions” bolıp, ol informatsiya texnologiyaları tarawında u’lken ta’jiriybege iye, joqarı professional qa’nigeler shtatınan ibarat, mobil ha’m web texnologiyalar bag’darında jan’a ideyalar usınıwshı, professional joybarlawshı bolıp tabıladı. Bul kompaniya 2009 jıldan berli elimizde iskerlik ko’rsetpekte. Ol Uztelecom, Ucell, Beeline, Infinbank, Samsung Georgiya, Navteq, Nokia Georgiya ha’m t.b. kompaniya ha’m sho’lkemler menen birge islesedi.

Ko’rgizbe dawamında İT qa’nigeler ushın bos jumıs orınları yarmarkası sho’lkemlestirildi. Sheberlik sabaqları, tu’rli İT bag’darındag’ı seminar ha’m forumlar, viktorina oyınları, miymanlarg’a sawg’alar, fotosessiyalar, jumısqa kiriw tan’lawları ha’m basqada ila’jlar sho’lkemlestirildi. Sonday-aq ko’rgizbege qatnasıwshı kompaniyalar, oqıw orınları, kontent islep shıg’arıwshılar, provayderler arnawlı diplom menen xoshametlendi ha’m nominatsiyalar boyınsha sıylıqlandı.





Ha’r jılı da’stu’rge aylang’an ko’rgizbenin’ 7-jılı mine usınday ko’terin’lik da’rejede este qalarlı waqıyalar menen juwmaqlandı.


Avtorı: Kalmuratov B.
Tashkent qalasınan megaline.uz ushın arnawlı.