Elimizdegi informaciya texnologiyaları tarawınıń sońǵı jetiskenlikleri “Best Soft Uzbekistan – 2013” kórgizbe forumında sáwlelendi
2013- jıldıń 15-16 may kúnleri Tashkent qalasındaǵı Uzekspo orayında “Best Soft Uzbekistan – 2013” baǵdarlamalıq ónimlerdiń forumı hám milliy kórgizbesi bolıp ótti. Kórgizbege jergilikli hám sırt el baǵdarlamalıq ónimlerdi islep shıǵarıwshılar óz ónimleri menen qatnastı.
Búgingi kúnde informaciya kommunikaciya texnologiyaları turmıstıń barlıq tarawlarına kirip keldi. Bul bolsa óz gezeginde softver sanaatınıń jedel rawajlanıwına keń jol ashpaqta. Atap ótsek, házirgi kúnde mámleketimizde baǵdarlamalıq ónimlerdi jaratıw, islep shıǵarıw hám engiziw menen shuǵıllanıwshı subyektler iskerlik kórsetpekte. Olardıń islenbeleri, baǵdarlamalıq ónimleri mine usı kórgizbede orın aldı.
Usı jılǵı forum kórgizbeniń tiykarǵı baǵdarları mámleketimizde “Elektron húkimet” sistemasın engiziw hám milliy baǵdarlamalıq ónimler bazarın rawajlandırıwdan ibarat. Sonday aq forumǵa baǵdarlamalıq ónimlerdi islep shıǵıw hám engiziw tarawındaǵı jetekshi qánigeler qatnastı. Ekspertler usı tarawdaǵı sońǵı jetiskenliklerdi usındı hám óz tájiriybeleri menen bólisti. Forum jumısı úsh sekciyada bolıp, “Elektron húkimet” kontsepciyası: xalqara tájiriybe, Ózbekstan “Elektron húkimet” kontsepciyası:interaktiv mámleket xızmetlerin islep shıǵıw hám engiziw hámde Softver sanaatı rawajlanıwınıń tendenciyaları hám jetiskenlikleri, IT bilimlendiriw, baǵdarlamashı kadrlar menen támiyinlew.
Ótken jılı kórgizbege 40 baǵdarlamalıq ónimlerdi islep shıǵarıwshılar qatnasıp, 80 nen artıq islenbeleri usınılǵan bolsa, usı jılı 60 tan aslam kompaniyalar qatnasıp, olar 120 ǵa shamalas óz islenbeleri menen qatnastı.
IT kompaniyalar menen bir qatarda kórgizbege Mırza Uluǵbek atındaǵı Ózbekstan Milliy Universiteti hám Tashkent informaciya texnologiyaları universiteti oqıtıwshıları hám studentleri tárepinen islep shıǵılǵan texnikalıq islenbeler hám baǵdarlamalıq ónimler qoyıldı.
Kórgizbege qoyılǵan ónimlerden: “Kóp funkciyalı kodlanǵan qulp”
TITU Telekommunikaciya qánigeliginiń 3 kurs studenti Kurbanov Alisher “Kóp funkciyalı kodlanǵan qulp” islenbesin kópshilik názerine usındı. Usı islenbeni esiklerge ornatsa giltsiz qulpırıw múmkinshiligin beredi hám úy iyeleri giltsiz, kod arqalı ashıw hám qulpırıw múmkinshiligine iye. Usı islenbeniń baǵdarlamalıq támiyinleniwi C baǵdarlamalastırıw tilinde jazılǵan bolıp, ol 2012 jıldıń dekabr ayınan usı jıldıń yanvar ayına shekem islep shıǵılǵan. Sonday-aq Alisher TITUniń ziyrek studentlerinen. Ol keleshekte FTTB texnologiyası boyınsha shuǵıllanbaqshı hám bul texnologiya boyınsha oktyabr ayında ótkeriletuǵın konferenciyaǵada qızǵın tayarlanbaqta.
Informaciya sistemaların avtomatlastırıw
TITUniń jáne bir ziyrek studenti “Informaciya sistemaları” 2 kurs magistrantı Mahmanov Orif. Ol usı kórgizbege
• “Kadrlar bólimin basqarıw sisteması”;
• “Informaciya texnologiyaların úyreniwge arnalǵan interaktiv multimediya sisteması” hám
• “Dekanat jumısın avtomatlastırıw” informaciya sistemaların kópshilik názerine usındı.
Shet tillerin úyreniw zaman talabı
TITU Nókis filialı studenti, Ózbekstan Respublikası baylanıs informaciyalastırıw hám telekommunikaciya texnologiyaları mámleketlik komiteti stipendiantı Kalmuratov Bekbosın inglis tilin ózbetinshe úyreniwshiler ushın arnalǵan “Q-LING” baǵdarlamasınıń 4 versiyasın kópshilik názerine usındı.
Jańa interaktiv xızmetler xalıq iygiliginde
UzINFOCOM Orayı tómendegi jobalar menen qatnastı:
• E-kommunal.uz kommunal xojalıǵı hám úy-jay fondı portalı;
• ID.UZ jalǵız identifikaciya sisteması (jańa usılda);
• uMail.uz biypul elektron poshta xızmeti;
• Ziyonet portalındaǵı “Shet tili” bólimi.
Sonday-aq “Best Soft Uzbekistan – 2013” forum kórgizbesinde Hindistan hám Koreyalı kompaniyalardıń ónimleri qoyıldı.
Kórgizbede kópshilik itibarın tartqan jáne bir islenbe “AVTO TEST” elektron oqıw qollanbası boldı. Bunda multiplikaciyalıq kórinisler arqalı jol háreketi qaǵıydalarınan test sorawların beredi. Bul baǵdarlama arqalı paydalanıwshılar shofyorlıq gúwalıǵın alıw imtixanlarına tayarlanıwǵa kómeklesedi hám jol háreketi qaǵıydaların jánede tolıq ózlestiriwge imkaniyat jaratadı.
Tekst qátelerin tekseriw
Yurida Orfo kompyuter baǵdarlaması ózbek tilindegi kirill hám latın álippesindegi tekstti orfografiyalıq jaqtan tekseriwge arnalǵan. Baǵdarlama tekstler menen islewshi kóplegen funkciyalardı atqaradı.
Salıq tólewshiler ushın jańa xızmet
Jańa texnologiyalar ilimiy-informaciya Orayı tárepinen salıq tólewshiler ushın interaktiv xızmetlerin usındı. Bul sistema online hám offline rejiminde de isleydi.
Kórgizbege óz ónimleri menen qatnasıp atırǵa iri kompaniyalardıń biri “Global Solutions” bolıp, ol informaciya texnologiyaları tarawında úlken tájiriybege iye, joqarı professional qánigeler shtatınan ibarat, mobil hám web texnologiyalar baǵdarında jańa ideyalar usınıwshı, professional joybarlawshı bolıp tabıladı. Bul kompaniya 2009 jıldan berli elimizde iskerlik kórsetpekte. Ol Uztelecom, Ucell, Beeline, Infinbank, Samsung Georgiya, Navteq, Nokia Georgiya hám t.b. kompaniya hám shólkemler menen birge islesedi.
Kórgizbe dawamında IT qánigeler ushın bos jumıs orınları yarmarkası shólkemlestirildi. Sheberlik sabaqları, túrli IT baǵdarındaǵı seminar hám forumlar, viktorina oyınları, miymanlarǵa sawǵalar, fotosessiyalar, jumısqa kiriw tańlawları hám basqada ilájlar shólkemlestirildi. Sonday-aq kórgizbege qatnasıwshı kompaniyalar, oqıw orınları, kontent islep shıǵarıwshılar, provayderler arnawlı diplom menen xoshametlendi hám nominaciyalar boyınsha sıylıqlandı.
Hár jılı dástúrge aylanǵan kórgizbeniń 7-jılı mine usınday kóterińlik dárejede este qalarlı waqıyalar menen juwmaqlandı.
Avtorı: Kalmuratov B.
Tashkent qalasınan megaline.uz ushın arnawlı.