Adobe Systems kompaniyasına 1982 jılı bag’darlamashılar Jon Wornok ha’m Sharlz Geshke tiykar salg’an. Kompaniya atı Jon Wornoktın’ u’yinin’ a’tirapınan ag’ıp o’tiwshi Adobe Greek daryası atınan alıng’an.

Basında jeterli qa’rejetke iye bolmag’anı ushın olar imkaniyat da’rejesinde miynet resurslarınan paydalanıwg’a ma’jbu’r boldı. Geshkenin’ 80 jaslı atası ofis dizayni menen shug’ıllang’an bolsa, Wornoktın’ kelinshegi Marva Wornok kompaniya logotipin islep shıqtı. Ko’pshilik kompaniya bunın’ menen uzaqqa bara almaydı, degen pikirde edi. Biraq aldı menen Mac ha’m IBM ushın shıg’arılg’an PostScript (baspaxana iskerliginde betlerdi su’wretlew tili) ko’p daramat keltirgen bolsa, 1989 jılg’a kelip, Adobe Illustrator ha’m Adobe Photoshop bag’darlamalarının’ shıg’arılg’anı bul kompaniyanı dag’darıstan saqlap qalıwı menen birge informatsiya texnologiyaları kompaniyaları arasında jan’a attın’ ashılıwına alıp keldi.

Kompaniya shıg’arg’an bag’darlamalıq o’nimlerdin’ qolaylılıg’ı olardın’ qa’legen qurılmalarg’a iykemlesiwi edi. Bul orında tu’rli kompyuterlerde hu’jjetti konvertatsiyasız oqıw, ha’tteki redaktorlaw mu’mkinshiligin beriwshi, Protable Document Format (PDF) missal keltiriw mu’mkin. PDF tan son’ Adobe Acrobat Reader bag’darlaması jaratıldı.

1992 jıldan kompaniya jan’a "tabıs formulası" tiykarında iske kiristi: olar kompyuter grafikası, tekst, dawıs ha’m video menen islew kerek edi. Bul jan’a bag’ıttag’I jumıslardı jaylastırıw ushın Adobe Systems jan’a ideyalar, ba’sekileslerinin’ texnologiyaların satıp ala basladı. Tekstti oqıytug’ın OCR Systems solay qolg’a kiritildi. 1993 jılda bolsa Adobe Premiere 3.0 bag’darlaması arqalı kompyuter paydalanıwshıları video ko’riw mu’mkinshiligine iye boldı.

Kompaniya 1995 jıldan baslap veb-dizayn ushın bag’darlamalar menen shug’ıllana basladı. 1997 jılı kompaniya ushın pa’rwaz ha’m qulaw jılı boldı desek qa’telespeymiz. Jan’alang’an PageMaker , Illustrator ha’m FrameMaker bag’darlamaları kompaniya daramatına payda qostı, biraq HP kompaniyasının’ PostScript litsenziyasınan bas tartıwı kompanıya ushın awır soqqı boldı. 1998 jılı Windows 98 shıg’ıwı menen jag’day ja’nede awırlastı: Windows media pleer, brouzer ha’m Word tekstli protsessorı en jayg’an edi. Tek 1999 jılg’a kelip, kompaniya o’z ornın tiklewge eristi, yag’nıy jan’a InDesign bag’darlaması QuarkExpresske ılayıq juwap boldı, usıdan keyin kompaniya aktsiyaları u’sh esege arttı.

Ha’zirgi waqıtta Adobe Systems kompaniyası pu’tkil du’nyag’a ataqlı tu’rli programmalıq o’nimler islep shıg’arıwshı en’ iri kompaniya bolıp tabıladı.

Bul kompaniyanın’ bag’darlamalıq o’nimlerisiz ha’zirgi waqıta turmıstın’ ko’pshilik tarawların ko’z aldımızg’a keltire almaymız. Bir ga’na Photoshop bag’darlamasının’ o’zi foto dizaynerlerdin’ jumıs quralına aylang’an desek qa’telespeymiz.