“BEST SOFT UZBEKISTAN” baǵdarlamalıq ónimlerdiń milliy kórgizbesi jaslar ushın imkaniyatlar maydanı

2013 jıldıń 15-16 may kúnleri Tashkent qalasında “BEST SOFT UZBEKISTAN 2013” baǵdarlamalıq ónimlerdiń milliy kórgizbesi bolıp ótedi. kórgizbege tiykarınan elimizdegi, sonday-aq sırt elli informaciya texnologiyaları kompaniyaları – baǵdarlamalıq ónimlerdi islep shıǵarıwshılar, provayderler, ilimiy hám bilimlediriw orınları, ministrlikler hám basqada shólkemler óz islenbeleri menen qatnasadı.

Sonı aytıp ótiw lazım, 17 may Birlesken Milletler shólkemi tárepinen Xalıqaralıq informaciya jámiyeti kúni dep járiyalanǵan hám sol tárepten hápteniń zárúr waqıyaları – Milliy baǵdarlamashılar forumı hámde “BEST SOFT UZBEKISTAN 2013” Milliy kórgizbeniń shólkemlestirilgenligi elimizdiń bul tarawdaǵı xalqara baslamaǵa qosıp atırǵan ózine tán úlesi bolıp tabıladı.

Maǵlıwmatlarǵa qaraǵanda, házirgi waqıtqa shekem mámleketimizde baǵdarlamalıq ónimlerdi islep shıǵarıw hám engiziw menen shuǵıllanıwshı 200 den artıq subyekt iskerlik kórsetpekte. Bul jılǵı kórgizbegede eń tańlawlı, hámmeniń itibarın ózine tartatuǵın joybarlar kópshilikke tanıstırıladı hám prezentatsitya etiledi.

Bul jılǵı kórgizbege TITU Nókis filialı oqıtıwshısı Elmurad Babajanov penen usı oqıw dárgayınıń studenti Kalmuratov Bekbosın baǵdarlamalıq ónimlerin qoyıw huquqın jeńip aldı. Házir olar qızǵın tayarlanbaqta.

- Bıyıl bul kórgizbege qızǵın tayarlıq ústindemiz, ótken jılı bul kórgizbege belsendi qatnastım hám ózim islep shıqqan baǵdarlamalıq ónimlerim qániygeler tárepinen joqarı bahalandı, sonday-aq ózim qatarı jas baǵdarlamashılardıń joybarları menen tanıstım, sırt elli iri kompaniyalardıń ónimleri sonday-aq elimizdegi softver sanaatındaǵı iri kompaniyalar menen bir qatarda meniń hám baǵdarlamamnıń qoyılıwı men ushın hám TITU hám TITU Nókis filialı ushında úlken jetiskenlik dep oylayman. Bul jılıda qızǵın kúni-túni tayarlanbaqtamız. Sebebi kórgizbe sheńberinde “Eń jaqsı student jobası” tańlawınada qatnasaman. – deydi TITU Nókis filialı studenti Bekbosın Kalmuratov.

Bul jılǵı kórgizbege TITU Nókis fililalı oqıtıwshısı Elmurad Babajanov “Bilimlendiriwde interaktiv xızmet kórsetiw sisteması” jobası menen qatnasadı. Bul jobanıń qolaylıqları zamanagóy veb texnologiyalar tiykarında jaratılǵan bolıp, joqarı oqıw orınlarında iskerlik alıp barıwshı oqıtıwshılar, studentler hám basqada paydalanıwshılarǵa xızmet kórsetiwdi avtomatlastırıw imkaniyatın berip, mútájlikke tiykarlanǵan halda esabatlar dúziledi hám interaktiv xızmetler ámelge asırıladı. Jobanıń baslı maqseti joqarı oqıw orınları studentleriniń reyting sistemasınan baslap, oqıtılǵan pánlerdi, metodikalıq komplekske tiyisli maǵlıwmatlardı avtomatlastırıw hám ministrlikten hár bir joqarı oqıw ornı alǵan maǵlıwmatlardı óziniń serverinde saqlawı hám onı kafedra hám bólimlerge elektron halda jetkerip beriwden ibarat.

Sonday-aq bul jılǵı kórgizbege Bekbosın Kalmuratovtıń inglis tilin óz betinshe úyreniwshiler ushın arnalǵan “Q-LING” kompyuter baǵdarlamasınıń 4-jańa versiyası menen qatnasadı. Bul baǵdarlamanıń 4 versiyası 2013 jılı islep shıǵılǵan bolıp, onıń 1,2,3 versiyalarınan kóp artıqmashılıqlarǵa iye, sonday-aq 4-versiyada baǵdarlama interfeysi ózbek tilinde de iskerlik kórsetedi, informaciya qáwipsizligi de joqarı dárejede qorǵalǵan hám Windowstıń barlıq versiyaların qollay aladı. Házirgi waqıtta Bekbosın Q-LINGniń 5 versiyasın islewdi baslap jiberdi. Onıń múmkinshilikleri mobil baylanıs qurılmaları platformalarına maslasqan boladı, yaǵnıy Android hám Mac OSlarınada beyimlesedi.

Kórgizbe sheńberinde “Baǵdarlamalıq tamiynat – jıl markası”, “IT-bilimlendiriw tarawındaǵı eń jaqsı kompaniya”, “2012 jılda engizilgen eń jaqsı joybar”, “Baǵdarlamalıq tamiynat tarawındaǵı eń jaqsı studentler islenbesi” nominaciyaları boyınsha respublika tańlawınıń jeńimpazları sıylıqlanadı.




Sonday-aq jumısqa ornalasıw hám kásipke baǵdarlaw boyınsha bos jumı orınları yarmarkası ótkeriledi.