Baǵdarlamashılardıń milliy forumı

Tashkent qalasında usı jıldıń 15 may kúni "BEST SOFT UZBEKISTAN 2012" Baǵdarlamashılardıń milliy forumı bolıp ótti. Forumda Ózbekstan softver sanaatı, bir qatar sırt elli jetekshi kompaniya qániygeleri hám ekspertler sonday-aq mámleket jámáát shólkenleri hám mekeme wákilleri qatnastı.

Baǵdarlamashılardıń bul milliy forumında baǵdarlamalıq ónimlerdi islep shıǵarıw hám onı engiziw tarawınıń jetekshi qániygeleri de jıynaldı. Forumda xalıqaralıq hám jergilikli informaciya-kommunikaciya texnologiyaları kompaniyaları – óndiriwshiler hám integratorlar, kontent islep shıǵarıwshılar, xızmet kórsetiwshi provayderler, ilimiy hám bilimlendiriw mekemeleri, ministrlik hámde mekeme wákilleri qatnastı. Olar usı tarawdaǵı sońǵı jetiskenlikler haqqında tolıq maǵlıwmat berip, tájiriybe almasıp prezentaciyalar hám bilimlendiriw seminarları ótkerildi.

Bul forumdı ótkeriwden tiykarǵı maqset jetekshi qániygeler, mámleket basqarıw organları, biznes hám jámáátshilik institutları wákillerin tarawdaǵı eń sońǵı tabıslar menen tanıstırıw, olarǵa óz- ara tájiriybe almasıw, baǵdaralamalıq ónimlerdi islep shıǵarıw hám engiziw tarawın rawajlandırıw aldaǵı keleshegin ortaǵa salıw, tarmaqtı rawajlandırıw, kadrlar tayarlaw procesin huquqıy tárepten támiyinlew boyınsha usınıslar islep shıgıw ushın imkaniyat jaratıw
Forum dawamında Z. Raxmatullaev baǵdarlamalıq támiyinleniw sanaatı rawajlanıwınıń mámleket tárepinen qollap quwatlanıwı hám
jetiskenlikleri haqqında bayanat jasadı.

Mámleketimizde baǵdarlamalıq ónimlerdi islep shıǵarıwǵa qániygelesken kárxanalarǵa bir qatar jeńillikler jaratılǵan.
Baǵdarlamalıq ónimler bazarın rawajlandırıw maqsetinde xalıqaralıq baylanıslardı keńeytiw boyınsha bir qatar jumıslar ámelge asırıldı. Atap ótsek, baǵdarlamalıq ónimler islep shıǵarıwshı 16 jetekshi kompaniyalar menen ushırasıw hám prezentaciyalar ótkerildi, Hindistannıń baǵdarlamalıq ónim islep shıǵarıwshı "HCL Technologies Ltd." hám "InfoSys" kompaniyaları delegaciyası Ózbekstanda bolıp, usı baǵdarda bir qatar kelisimlerge erisildi. Sonday-aq usı jıldıń 29-fevralında Informaciya texnologiyaları tarawında Ózbekstan baylanıs hám informaciyalastırıw agentligi hám Microsoft Ireland Operations Limited penen birge islesiw kelisimine qol qoyıldı.
Baǵdarlamashılar milliy forumında usı baǵdardaǵı usınıslar qabıl etiw ushın qolaylı imkaniyat ekenligi atap ótildi. Sonday-aq baǵdarlamashı qániygeligi boyınsha kadrlar menen támiyinlew, tájiriybeli baǵdarlamashılardı tayarlaw hám kompyuter bilimlendiriw kursların shólkemlestiriw boyınsha sóz etildi.

Forum dawamında bir qatar temalarda: jaslar ushın arnalǵan baǵdarlama – internet hújimine qarsı; baǵdarlamalastırıw tili, túrli processlerdi avtomatlastırıw; ID-kartalar; Internet-banking; baǵdarlamalıq ónimler bazarın rawajlandırıwda ilimiy izertlew iskerliginiń roli; baǵdarlamalastırıw boyınsha intellektual jarıslar hám aralıqtan oqıtıw ushın baǵdarlama sheshimi durıslıǵın avtomat testen ótkeriwshi sistema haqqında hám taǵıda basqa temalarda bayanatlar jasaldı.
Forum usı taqılette tájiriybe almasıwlarǵa bay, qızıqlı hám mazmunlı ótti.