Du’nya ju’zinde qansha xalıq bolsa ko’pshiligin jaslar quraydı. Jaslardın’ bolsa ko’bisi studentler. Studentler ja’miyette u’lken massa ha’m o’z ornına iye ku’sh bolıp esaplanadı.

O’tken 2012 jıl sportshı, bilimli jaslarımız ushın umıtılmasday jıl bolıp qaldı. 2012 jılı olar waqtınan burın student bolıw imkaniyatın qolg’a kirgizdi.

Bu’gin ma’mleketlik isker, ja’miyetlik g’ayratkerler, siyasatshı, alımlar ba’ri de student bolg’an. Olardan studentlik da’wiri haqqında sorasan’ız "Studentligin – altın da’wirim" dep qoyadı. Bunın’ ma’nisi ne eken?!

2012 jılı studentler arasında u’lken jan’alıqlar boldı. 2011-2012-oqıw jılında Berdaq atındag’ı qaraqalpaq ma’mleketlik universitetinin’ dene ta’rbiyası bakalavr bag’darına shempion sıpatında imtixansız bes jas oqıwg’a kirip, student boldı.


Da’wletbiyke Yaxshimuratova. Sporttın’ erkin gu’res tu’ri menen shug’ıllanadı. 2011-jılı jaslar arasında O’zbekstan shempionı, eresekler arasında O’zbekstan shempionı. İndoneziya Djagarda qalasında Aziya shempionatında 4-orın iyesi boldı. 2011-jıl dekabr ayında Angliyada bolıp o’tetug’ın Aziya shempionatına qatnasıwg’a jollama aldı.


Ernazar Xamidullaev. Sporttın’ eskek esiw tu’ri boyınsha shug’ıllanadı. 2009-jılı may ayında Moskva qalasında bolıp o’tken "Большая Московская регата" jarısında 2 altın medal iyesi boldı. 2011-jıl may ayında Tashkent qalasında o’tkerilgen O’zbekstan birinshiliginde 1-orın, 2011-jıl Singapur qalasında bolıp o’tken Aziya shempionatında altın medal, 2011-jıl oktyabr ayında Samarqand qalasında bolıp o’tken O’zbekstan gu’zgi shempionatında 2 altın medal, 2012 jılı 13-17-oktyabr ku’nleri Qubla Koreyada o’tkerilgen Aziya shempionatında 1 ha’m 2-orıng’a miyassar boldı.


Nursulıw Berdaxova. 2002-jıldan baslap sporttın’ dzyu-do, milliy gu’res tu’rleri menen turaqlı shug’ıllanıp kiyatır. Ol 21 altın, 5 gu’mis, 1 qola medallar iyesi. 20 ma’rte Qaraqalpaqstan, 9 ma’rte O’zbekstan shempionı boldı.

2010-jılı Shırshıqta o’tkerilgen O’zbekstan shempionatında 1-orındı iyelep, sport sheberi boldı. 2012-jılı ja’nede O’zbekstan saylandı komandası ag’zasına kirdi. Qarshı qalasında o’tkerilgen O’zbekstan shempionatında 1-orındı iyelep O’zbekstan shempionı boldı.

Bir jıldag’ı eki iri tabısı menen qatarı arasında erte student bolıw imkaniyatın qolg’a kirgizdi.


Nilufar Gadaeva. Sporttın’ erkin gu’res tu’ri menen shug’ıllanadı. 2008-jılı Tashkent qalasında bolıp o’tken Aziya shempionatında 3-orın iyesi boldı. 2010-jılı Tashkent qalasında bolıp o’tken Aziya shempionatında 2-orın iyesi. 2012-jılı Singapur qalasında bolıp o’tken 1-Jaslar olimpiadasında 3-orın iyesi. Bir neshe ret O’zbekstan shempionı.


Bahadir Tolıqbaev. 2006-jılı noyabr ayında Shırshıq qalasında bolıp o’tken gu’res boyınsha spartakiadada 3-orın, 2010-jılı Sırdarya wa’layatında bolıp o’tken spartakiadada O’zbekstan shempionı, Dzyu-do boyınsha Nawayı qalasında 2008-jılı O’zbekstan birinshiliginde 1-orın, Turan jeke gu’resi boyınsha bir neshe ret O’zbekstan shempionı. 2007-jılı Aziya shempionatında 3-orın, 2008-jıl xalıqaralıq turnirde 3-orın, 2007-2011-jılları O’zbekstan Qa’harmanı A.O’teniyazov esteligine arnap o’tkerilgen turnir jen’impazı.


Bul sportshı jaslar bu’gin sporttag’ı sheberligi, tabısı menen student boldı ha’m olar elimiz dan’qın du’nyag’a tanıtıwg’a u’les qosıwg’a bel baylag’an.

Ha’r jılı bilimler ba’ygesinin’ jen’impazları anıqlanadı. Bıyıl da pa’n olimpiadasında jen’impaz bolıp, joqarı oqıw ornının’ student bolıw imkaniyatına iye bolg’an jaslar doslarınan burın student boldı.

Malika Orazbaeva:- Berdaq atındag’ı qaraqalpaq ma’mleketlik universitetinin’ filologiya fakultetinin’ 1-kurs student. Ol respublikalıq pa’n olimpiadasında qaraqalpaq tili ha’m a’debiyatı pa’ninen 1-orın iyesi boldı.


-Elimizde biz jaslarg’a jaratılg’an imkaniyatlar og’ada ko’p. Men o’zim usınday imkaniyattı qolg’a kirgizdim. Studentlik altın da’wirge qa’dem qoyıp atırmız.


Shaxsanem Ken’esbaeva:- Berdaq atındag’ı qaraqalpaq ma’mleketlik universiteti filologiya fakultetinin’ 1-kurs studentimen. Respublikalıq pa’n olimpiadasının’ 2-orın jen’impazı boldım. Bos waqtımda sporttın’ Aikido tu’ri ha’m kesteshilik penen shug’ıllanaman. Aikido federatsiyası ta’repinen o’tkerilgen attestatsiyag’a qatnasıp, diplom ha’m sertifikat penen sıylıqlandım.

O’zlerimizge jaratılg’an imkaniyatlardan utımlı paydalanıp, u’lgili student bolıp bilim alsam deymen. Studentlerge u’lken tabıslar tileymen.


Gu’limxan Shaniyazova:- Respublikalıq pa’n olimpiadasında qaraqalpaq tili ha’m a’debiyatı pa’ninen 3-orın eyesi boldım. Ha’zir Berdaq atındag’ı qaraqalpaq ma’mleketlik universiteti filologiya fakultetinin’ qaraqalpaq tili ha’m a’debiyatı qa’nigeliginin’ 1-kurs studentimen.


Usınday u’lken jetiskenliklerdi qolg’a kirgizip, waqtınan burın student bolıw imkaniyatına erisken jaslar og’ada ko’p. Sporttag’ı sheberligi, oqıwda teren’ bilimi menen du’nyag’a tanılıp atırg’an da student jaslar. Studentlik altın da’wirdin’ ha’r bir ku’nin mazmunlı o’tkeriwdi o’zlerinin’ parızı dep biledi. Olar elimizdin’ zıyalı, ma’deniyatlı, en’ aldıng’ı wa’killeri bolıp jetisiwine isenimimiz ka’mil.


Jumagu’l Embergenova.
Gu’lshat Esbosınova