Sony ónimleri hám onıń iskerligi

Sony korporaciyası 1946 jılı Yaponiyada dúzilgen. Oǵan Tokio janındaǵı Minato qalasında tiykar salınǵan. Sony Corparation turmısta paydalanatuǵın elektro-ónimler hám elektronikalıq joqarı texnologiyaǵa iye ónimlerdi islep shıǵarıw menen shuǵıllanadı. Sonıń menen bir qatarda Sony dúnyadaǵı eń iri media kompaniyalardıń biri bolıp tabıladı. Sony Music Entertaiment dawıs jazıw markasına, Columbia Pictures hám TriStars Pictures kinostudiyalarına, MGM kompaniyasınıń tolıq filmler arxivine iye.

Tariyxı
Kompaniyaǵa 1946 jılı 7 mayda Akio Morita hám Masaru Ibuka tiykar salǵan. Kompaniyanıń dáslepki atı “Tokyo cusin kogyo kabusiki kaysa” bolǵan, qısqasha totsuko dep atalǵan. Yaǵnıy, házirgi “Sony” eki sózdiń birikpesinen kelip shıqqan bolıp, latınsha sonus “dawıs” hám inglisshe “sunny boys” (kún balaları) al yaponsha “kishkentay danıshpanlar” mánisine iye. Sony ataması 1958 jıldıń yanvar ayında qoyılǵan.

Kóp jıllar dawamında kompaniyaǵa Morita basshılıq etti, ekonomikada úlken jetiskenliklerge eristi. 1950 jılları kompaniya óziniń dáslepki “TR-63” radio apparatın islep shıǵarǵan.

Ónimleri
Sony Rolly atlı muzikaǵa oynaytuǵın robottı, AIBO atlı iyt tárizli robottı islep shıǵardı. 1970-1980 jılları birinshi portativli Walkman audiopleyerdi islep shıǵara baslaydı. 1983 jılı Philips kompaniyası menen birgelikte kompakt-diskler islep shıǵardı.

Al 1990 jıldıń ishinde Sony 500 ge shamalas jańa ónimler jaratqan.

1994 jıldıń sońında korporaciya PlayStation oyın konsolın usınadı. Onıń sátli bolǵanı sonshelli 2000 jılı PlayStation 2, 2006 jılı Playstation 3 oyınların islep shıǵaradı.

Sony xızmetleri
-Sony Corporation - turmısta paydalanatuǵın elektro-ónimler hám elektronikalıq ónimler;
-Sony Computer Entertaiment – PlayStation oyınları hám video oyınlar;
-Sony Pictures Entertaiment – kinokartinalar óndiriwshi;
-Sony Music – muzikalıq taraw;
-Sony Financial – Finanslıq sfera;
-Sony Ericson – mobil telefon óndiriwshi;
-Sony VAIO – noutbukler óndiriwshi;
-Sony Bravia – televizorlar óndiriwshi.

2010 jıldıń 31 martında korporaciyanıń ulıwma jumıshılar sanı 167 900 adamdı quraǵan.