“Mail.Agent kimniń úyi?!”: Hár nárseniń óz ornı bar
Házirgi waqıtta dúnya júzi boyınsha internet paydalanıwshılarınıń kópshiligi sociallıq tarmaqlardan paydalanadı. Hátteki ayırım jaslarımız internet dese kóz aldına sociallıq tarmaqlar keledi. Házirgi globallasıw processinde Facebook, Twitter, Moy Mir, Odnaklassniki sıyaqlı sociyallıq tarmaqlardıń paydalanıwshıları jıldan jılǵa artıp barmaqta. Baylanıs quralına aylanǵan bunday sociyallıq tarmaqlardıń tásirine túsip qalǵan jaslarımızda az emes. Al házirgi waqıtta biziń jaslarımız qaysı sociyallıq tarmaq xızmetlerinen paydalanadı? Hám qanday maqsetlerde degen soraw óz-ózinen tuwıladı.
Bul sorawdıń juwabın jası úlken ata-apalarımızdan da sorasańız aytıp beriwi múmkin. Bul Mail.Agent (m.Agent) baylanıs quralı. Hátteki xalqımız arasında m.Agent haqqında házillerde ushırasadı. «At penen izlegen adamıńdı m.Agent-ten tabasań, Balamdı hesh jerden taba almay atırman degen ata-anaǵa qońsısı m.Agent-ten izlep kórdińbe?» degen házillerde kóbeyip baratır. Al bul tarmaqtan paydalanıwshılardıń kópshiligi jaslar desekte qátelesemiz. Sebebi úlken-kishiniń kewlinen shıǵa bilgen bul tarmaqqa eresek adamlarda dizimnen ótip «agentshilerdiń» qatarı kún sayın artıp barmaqta.
2003 jılı Rossiyada mail.ru kompaniyası óz iskerligin baslaǵan edi. Dáslepkisinde bul kompaniya óz iskerligin elektron poshta xızmetinen baslaǵan bolsa, keyin ala ol turmıstıń barlıq tarawların óz ishinde qamtıytuǵın iri jobalar kompleksin jámlep úlken portalǵa aylandı. Mine usı jobalardıń ishinde m.Agent xızmetide payda boldı. Dáslepkisinde bul baylanıs quralınan internet tarmaǵına jalǵanǵan jeke kompyuter paydalanıwshıları paydalanǵan bolsa al házirgi kúnge kelip mobil baylanıs qurallarınan paydalanıwshılarda bul xızmetke qosılǵan. Informaciya ásirinde internet tarmaǵı hár bir úyde emes al hár bir adamnıń qaltasında desek qátelespeymiz. Sonlıqtan da m.Agent xızmetinen uyalı telefonlar arqalı qálegen orınlarda paydalanıw múmkinshiligi bar degen sóz.
m.Agent xızmetiniń múmkinshilikleri haqqında kóp nárse aytıwǵa boladı. Biraq biz oǵan toqtalıp ótpeymiz.
Sońǵı waqıtları kóshede de, jumısta da, bándirgilerde de, awqatlanıw orınlarında da m.Agent tarmaǵınan paydalanıp atırǵan jaslarımızdı ushıratamız. Hátteki avtobustıń ishinde m.Agent arqalı baylanısta bolıp, túsiw bándirgisinen ótip ketken jaslardı da ushıratamız. Sonday aq toy merekelerimizde ayırım qız-kelinsheklerimiz qasındaǵı qurdaslarınıń sáwbetinen alıslap qolındaǵı temir qutıǵa qarap jańalıq kútetuǵınday kóz úzbeydi yamasa qolı tınbay bir nárselerdi jazıp otırǵanınıńda gúwası bolıp atırmız. Kópshilik jaǵdaylarda alıs jaqındaǵı aǵayın-tuwısqanlardı da, qurbı-qurdaslardı da jaqınlastırıp qatnasıqtı bekkemleytuǵında mine usı toy. Al bunday imkaniyatlardan bas keship, átirapındaǵılardıń sáwbetine qulaq aspay virtual ómirdegi dosları menen sáwbetlesip otırǵanlardı kórseń olar ózleriniń haqıyqıy ómirdegi jaqınlarınan qarım qatnası alıslap virtual ómirdegi dosların haqıyqıy ómirdegi doslarına almastırdı ma eken dep te qalamız.
Hár zattıń óz mólsheri, shegarası bolǵanı sıyaqlı altın waqtımızdı únemli paydalanıp, m.Agent-ten de tek ǵana zárúrli hám mazmunlı nárseler haqqında sáwbetlessek maqsetke muwapıq boladı. M.Agent arqalı qanshama dos arttırsaqta haqıyqıy ómirimizdegi doslarımızdan bas keshpeyik. Dana xalqımız «júz somıń bolǵansha, júz dostıń bolsın» dep biykar aytpaǵan.
Avtorı: Kalmuratov B.