Araq qumarlar menen gúresiw ushın endi uyalı telefonlar da at salısadı

Shotlandiyada spirtli ishimlikler ishiwshiler menen gúresiwdiń jańa jolı oylap tabıldı. Bunıń ushın mobillik qurılmalarǵa ornatılǵan arnawlı Drinking Mirror atlı baǵdarlama islep shıǵıldı. Bul baǵdarlama tek ǵana háyellerge arnalǵan.

Baǵdarlamanıń atqaratuǵın jumısı júdá ápiwayı bolıp, paydalanıwshı uyalı telefonına ornatılǵan baǵdarlamanı iske qosıp, baǵdarlama shártlerin orınlawı kerek. Yaǵnıy dáslep paydalanıwshı uyalı telefonı arqalı súwretke túsip, keyin bir hápte dawamında ishken araǵınıń muǵdarın kórsetiwi kerek. (bir butılka spirtli ishimlikti baǵdarlama – 175 ml dep qabıl etedi). Maǵlıwmat berilgennen keyin baǵdarlama súwretke túsken háyeldiń 10 jıldan keyingi bet-álpetin islep kórsetedi. Eger paydalanıwshı araqtı ishe berse, uyalı telefonındaǵı súwretine qarap tobaǵa keledi deydi joba avtorları. Bul jobanı tek háyel adamlarǵa arnaǵanıda biykar emes, sebebi háyel adamlar óz kelbetiniń jaqsı saqlanıwı ushın qolınan kelgen hámme isti qıladı eken.

Drinking Mirror baǵdarlaması android 2.2 hám onıń jańa úlgilerine de ornatıladı eken. Usı jıldıń mart ayına shekem bul baǵdarlamanı biypul júklep alıw jolǵa qoyılǵan.
Statistika boyınsha sońǵı 20 jıldıń ishinde Shotlandiyadaǵı 30-44 jastaǵı háyel qızlardıń spirtli ishimliklerge háwesligi eki esege kóbeygen.