Internet sırlarıńızdı saqlayma?!

Internettiń paydası menen bir qatarda zıyanıda kóp ekeni bizge málim. Google Map, Yandex Map kartaları (sputnik arqalı túsirilgen kartalar) házirgi waqıtta mámleket, qala, kóshe, mákan jay atların tawıp beretuǵın úlken sistemaǵa aylandı hám bul kartalardıń paydalanıwshıları da kópshilikti quraydı. Biraq bul sistema birewlerge paydasın tiygizse, al birewlerge baxıtsızlıq ákelipti. Olay dewimizdiń sebebi…

Yandex Map sistemasınıń kóshe súwreti bóliminde qoyılǵan foto, turmıs qurıwǵa bel baylaǵan eki jastıń ayırılsıwına sebepshi boldı. 24 jaslı Marina ismli qız Yandex Map izlew sistemasınan ózine kerekli mákan jaydı izleydi. Sonıń menen bir qatarda ol kóshe súwretin de qosıp izleydi. Tap usı waqıtta oǵan júdá tanıs bet álpet kóziniń aldınan shıǵadı. Kóshe súwreti retinde qoyılǵan fotoda óziniń 5 jıl boyı júrgen jigiti Sashanıń turǵanın kóredi.

Marina bılay deydi: “Kartadan júda tanıs adamdı kórdim. Úlkeytip qarap edim, meniń Sasham menen birinshi muxabbatınıń qol uslasqan súwreti turıptı. Súwretti kórip qattı qapa boldım. Toqtamay uzaq jıladım.”

Marina kórgen súwretin toyı jaqınlasıp qalǵan waqıtta Sashaǵa kórsetti. Sashanıń ústine muzday suw quyılǵanday boldı. Sóytip ol Marinaǵa bolǵan waqıyanı túsindiriwge tırısqan. “Men onı jaqsı kórmeymen, men aqmaqlıq isledim.” Biraq qız jigiti menen ayırılıstı. Bunday waqıyanıń ómirde bolǵanlıǵı Yandex kompaniyasındaǵılardıń jaǵasın uslattı. Adamlardıń usınısı boyınsha, kópshilik bul kartadan ózleriniń imaratları súwretlerin kóriwdi qáleydi eken. “Eger súwretti alıp taslaw haqqında bizge shaǵım túsip, hám kórsetilgen sebebi orınlı bolsa, biz súwretti alıp taslaymız” deydi kompaniya xızmetkerleri.