YouTube avtorı jańa videohosting ashpaqshı

YouTube saytınıń tiykarshısı Chad Xerli jańa videohosting islep shıǵarmaqshı. Bul tuwralı Texasta ótkerilgen internet-forumda belgili boldı. Xerli óz bayanatında jańa jobanıń bir-biri menen tereń baylanısta jumıs isleytuǵın adamlarǵa arnalatuǵınlıǵın ayttı.

Sonı aytıp ótiw orınlı, Chad Xerli YouTube portalınıń tiykarshısınıń biri bolıp tabıladı. Avtor burın sol kompaniyanıń atqarıwshı direktorı lawazımında islegen bolsa, 2010 jılı usı lawazımınan bosadı. Xerli soń “Formula-1” menen kiyim-kenshek dizaynı tarawı menen de shuǵıllandı.

YouTube saytı 2005 jılı 15-fevralda Kaliforniya shtatında ashıldı. Alexa analitikalıq kompaniyasınıń statistika maǵlıwmatları boyınsha sol waqıtları sayt ataqlılıǵı jaǵınan MySpace sociallıq tarmaǵınan ozıp ketti.

2006 jıldıń noyabr ayında YouTube xızmetin Google kompaniyası 1,6 milliard dollarǵa satıp aldı. Google kompaniyası YouTube-ti satıp almastan burın usıǵan uqsas xızmeti – Google Video bar edi. Onı Google wákilleri videoxostingli saytlar boyınsha videolardı izlew retinde qollandı. Házirgi waqıtta Google Video izlewine YouTube saytıda kiredi.