Dúnyaǵa ataqlı Android operaciyalıq sisteması haqqında nelerdi bilemiz?!
Házirgi waqıtta Android degende tek ǵana planshet, smartfonlar túsiniledi. Bul qashelli haqıyqat?!
Android – ıqshamlı (tarmaqlı) operaciyalıq sistema. Ol Linux yadrosınıń tiykarında islengen kommunikatorlar, planshetli kompyuterlerge, cifrlı pleerlerge, qol saatlarǵa, netbuklar hám smartbuklarǵa arnalıp islengen sistema. Dáslebinde bunı Android Inc. kompaniyası islep baslaǵan bolsa, sońınan bul kompaniyanı Google satıp aldı. Sonnan keyin Google házirgi waqıtta usı platformanıń rawajlanıwına at salısıp júrgen Open Handset Alliance alyansın qurıwǵa intasın bildirdi. Android Google kitapxanası arqalı islengen basqarıw qurılması menen Java-qollanbalardı islewge múmkinshilik beredi. Android Native Development Kit Si baǵdarlamalastırıw tilinde jazılǵan qollanbalardı isley aladı.
2008 jılı dáslepki nusqası shıqqannan berli sistema bir neshshe ret jańalanıp turdı. Bul jańalanıwlar sistemadan tabılǵan kemshilikler menen jańa funkciyalardı qosıw bolıp tabıladı. Hár nusqanıń óziniń kodlanǵan atı boladı. Kodtıń atı alfavit boyınsha beriledi. Házirgi waqıtta operaciyalıq sistemanıń 10 nusqası shıǵıp úlgerdi hám birewi tayarlıq ústinde.
2005 jıl iyulda – Google kompaniyası Android Inc. kompaniyasın satıp aldı. 2007 jılı 5 sentyabrde – mobil qurılmalarına arnalǵan ashıq standartlar islew maqsetinde qurılǵan Open Handset Alliance (OHA) kompaniya toparınıń qurılıwı haqqında rásmiy xabarladı. 12 sentyabrde – Android “Early Look” SDK islewshilerine arnalǵan dáslepki nusqasınıń paketi kórsetildi hám júklewge usınıldı.
2008 jılı 18 avgustte OHA SDK 0.9 beta jańa nusqası shıqqanı tuwralı xabarladı. Al 23 sentyabrde bolsa – Google kompaniyası T-Mobile mobilli operatorı menen hám tayvanlıq HTC kompaniyası menen birge jańa Android 1.0 platformasınıń bazasında jumıs isleytuǵin T-Mobile G1 (HTC Dream) smartfonı shıǵatuǵınlıǵı haqqında xabarlandırdı hám SDK 1.0, Release 1 óndiriwshisiniń dáslepki tolıq paketi shıǵarıldı.
2009 jılı
30 aprelde – jańalanǵan Android 1.5 (Cupcake) versiyası rásmiy túrde shıqtı.
15 sentyabrde – Android 1.6 (Donut) versiyası shıqtı.
26 oktyabrde – Android 2.0 versiyası shıqtı.
3 dekabrde – Android 2.0.1 versiyası shıqtı.
2010 jılı 12 yanvarda – Android 2.1 versiyası shıqqan bolsa may ayında – Android 2.2 (FroYo) versiyası shıqtı. Al dekabr ayında Android 2.3 (Gingerbread) versiyası islep shıǵıldı.
2011 jılı 22 fevralda – Android 3.0 (Honeycomb) versiyası shıqtı. 15 avgustte – Google kompaniyası Motorola Mobility direktorlar keńesi menen telekommunikaciyalıq korporaciyanı 12,5 mlrd dollarǵa satıw haqqındaǵı kelisimge keldi. 19 oktyabrde –Android 4.0 Ice Cream Sandwich versiyası shıqtı.
Android-tıń 1.6 versiyasın islewshiler Native Development Kit komplektin qostı. Onıń menen linux-kitapxananıń standartlarına sáykes, C/C++ tili sistemasına arnalǵan tómen dárejeli moduller jazıwǵa boladı.
Kópshilik sholıwshılardıń aytıwınsha, Android óziniń básekilesi iOS-tan bir neshe xızmet túrleri jaǵınan alda tur eken, mısalı: veb-serfing, Google Inc. xızmet túrleri menen birgelikte jumıs islew hám t.b. Android sisteması iOS sistemasına qaraǵanda ashıq túrdegi platforma bolıp tabıladı, sonlıqtan onda kóp funkciyalardı qollanıwǵa boladı.
iOS penen Windows Phone 7-ge qaraǵanda Android-ta Bluetooth-diń bir waqıtta fayldı jiberip hám qabıl etiwge múmkinshilik jaratılǵan. Android apparatlarında dástúr boyınsha hújjetlerdi kompyuterden telefonǵa tez arada tasıwshı MicroSD-kardrideri boladı.
PC Magazine baspası Android 4.0 operaciyalıq sistemasın “Redakciya qálewi” atlı sıylıq penen marapatlandı, olardıń aytıwınsha , jańa OS platformaǵa kóplegen jańalıqlar alıp keldi, solardıń ishinde smartfon hám planshetli sistemalar arasındaǵı ayırmashılıqtı keltirgen. 2012 jıldıń iyun ayında «Ведомости» gazetasınıń xabarlawı boyınsha, Android óziniń baslı qarsılasın Apple-di planshet kompyuterler sawdasında jeńe alǵan.
Android sisteması basqa sistemalarǵa qaraǵanda ashıq platformaǵa iye. Sonlıqtan bul operaciyalıq sistemaǵa qollanbalar dúziw baǵdarlamashılar ushın qolaylı bolıp tabıladı. Házirgi waqıtta bul operaciyalıq sistemada dúnyadaǵı kóplegen mobil baylanıs quralları iskerlik kórsetedi. Demek bul sistema kópshiliktiń kewlinen shıqqan degen sóz.