Eki hám onnan da kóp yadrolı processorlardıń bir-birinen ayırmashılıǵı

Bizge belgili XXI ásir informaciya ásiri. Házirgi waqıtta informaciyalardı qayta islew, uzatıw, jetkerip beriw, qabıl etiw processlerin EEM-larısız kóz aldımızǵa keltire almaymız. Kompyuterlerdiń esaplaw operaciyaları processor arqalı ámelge asırıladı. Processor logikalıq arifmetikalıq ámellerdi orınlap, yad penen baylanısadı hám barlıq jergilikli qurılmalardıń jumısın basqaradı. Demek processordı kompyuterdiń júregi dewgede boladı. Ilim texnikanıń rawajlanıwı menen házirgi kúnde kúndelikli turmısımızǵa eki hám onnanda kóp yadrolı processorlar kirip kelmekte.

Jeke kompyuter satıp alıw aldında kompyuter dúkanlarında olardıń bahasın hám túrin soraǵanımızda "mınaw eki yadrolı, mınaw tórt yadrolı processor" degen sózlerdiń gúwası bolamız. Al olardıń bir-birinen ayırmashılıǵın bilemizbe? Ne ushın eki yadrolı yamasa tórt yadrolı?

Jeke kompyuterlerdiń esaplaw tezligi processorǵa baylanıslı. Processor qansha joqarı tezlikte islese, kompyuterde jumıs islew ónimdarlıǵıda sonshelli artadı. Informaciyalıq texnologiyalardıń rawajlanıwı menen processorlar óndiriwshi bir qansha firmalar arasında processordıń tezligin kúsheytiw boyınsha básekilesiwler payda boldı. Bul básekilesiwde Intel firmasınıń processorı islew tezligi boyınsha aldınǵı qatarǵa shıqtı.

Házirgi kúnge kelip processordıń tezligin kúsheytiw jarısı tamamlandı desekte boladı. Sebebi processordıń tezligi burınǵısınan da kúsheygen sayın, onıń jıllılıq bólip shıǵarıw quwatıda sonshelli joqarılaydı. Bul óz gezeginde unamsız jaǵdaylardı tuwdırdı. Bunday mashqalanı házirgi kúnde bir korpusqa eki processor ornatıw arqalı sheshti hám bunı eki yadro dep ataydı. Yaǵnıy islew tezligi burınǵısınan eki ese kúshli degen sóz, al bir korpusqa tórt processor ornatsa dáslepkisinen tórt ese kúshli hám tez isleydi bunı tórt yadrolı processor dep ataymız. Házirgi waqıtta Intel hám AMD firmalarınıń processorları qollanılıp kelmekte. Intel firmasınıń eki yadrolı processorı Core 2 Duo, al AMD firmasıniki Dual Core dep júritiledi.

B.Kalmuratov tayarladı.